Lunis 25 de Martzu 2024, in Biddacidru, in sa Mediateca comunali, bia Parrocchia 190, h. 16:00 ddoi est su de duus atóbius de su labboratóriu culturali in Língua Sarda “Lunis in su Tzínema.
Su film chi faint a biri est “Proibito” de su 1954 cun sa regia de Mario Monicelli e cun sa partitzipatzioni de Mel Ferrer, Amedeo Nazzari e Lea Massari.
S'istória contada in su film est pigada de su romanzu de Grazia Deledda “La Madre” e contat de Paolo Solinas, unu predi gióvunu, chi torrat in sa bidda nadia sua, in Sardigna, e s'agatat in mesu a sa disamistade intra de is famíllias de is Barras e de is Corraine. Aregordendi·si de s'amori chi annus innantis dd'acapiat a Agnesi, una de is duas fillas de is Barras, Paolo circat, agiudau de sa picioca, de ponni paxi intra de is duas famíllias. Sa chistioni iat podi acabbai beni, giai chi Costantinu, su cabufamíllia de is Corraine, bolit fai cojai su nebodi cun Agnesi, ma nisciunus at postu in contu chi sa picioca est ancoras indiosada de Paolo e duncas arrefudat in dónnia manera de si cojai. Sa desamistade, duncas, si fait ancoras prus violenta de prima. Paolo rendendi·si contu de èssiri ancoras indiosau de Agnesi e chi custa ddu cuntracàmbiat. bolit pediri de nci ddu cambiai a un'àteru logu. Est Agnesi perou a si ndi andat...
Su labboratóriu ddu fait s'assótziu culturali "Sarditinera" in collabboratzioni cun su Comunu de Biddacidru e s'assótziu culturali “SEMM – Sardegna Europa Mediterraneo Mondo”.
Su labboratóriu est a indonu e fait parti de is atividadis culturalis in Língua Sarda de sa Províntzia de su Sud Sardigna chi sa Regione Autònoma de Sardigna finantziat cunformas a sa L.482/99 e a sa L.R. 22/2018.
“Lunis in su Tzínema” est unu labboratóriu chi previdit sa proietzioni de 8 film o cortometràgius de argumentu sémpiri diferenti chi riguardant s'istoria e sa cultura de sa Sardigna. Su film podit èssiri in língua sarda o in língua italiana ma su chi aunit custus 8 atóbius est sa Língua Sarda, difatis is cumentus, is osservatzionis ddus faint totu in sardu.
Giai chi dónnia atóbiu riguardat un'argumentu diferenti, si podit abbitai su labboratóriu/atóbiu chi prus interessat.
Non ddoi at abbisóngiu de si iscriri a su labboratóriu, bastat a si presentai in sa Sala letura de sa Mediateca Comunali dónnia Lunis a is cuatru (16:00).